Road rage: Mister utas, 6 malubha
TUGUEGARAO CITY, Cagayan , Philippines — Napaslang ang isang mister habang malubhang nasugatan ang anim niyang kasama matapos na sadyang araruhin ng rumaragasang kotse ang kinalululanan nilang tatlong motorsiklo habang tinatakasan ang kanilang nakaalitan sa Brgy. San Fermin, Cauayan City, Isabela kahapon ng madaling araw.?
Sa report ni Supt. Nelson Vallejo, hepe ng Cauayan City Police; dead-on-the-spot si Anthony Macadangdang, 20, habang sugatan ang kanyang mga angkas na sina John Marck Sanchez, 19, at Bryan Baroga, 16, at ang iba pang biktima na sina Robbie Sinnott, 20, Ericka Jesura, 17, Derick Villafuerte, 21, at Daryll Ordonez, 19, na mga taga-Cauayan City ay isinugod sa pagamutan. ?
Bago ang aksidente, lumalabas na naunang nasangkot ang mga biktima sa isang alitan na nauwi sa rambulan sa loob ng isang lugawan laban sa grupo ni Aaron Reyes, 22, na taga-Aurora, Isabela dakong alas-4:30 nang madaling araw. ?Nabatid na tumakas sakay ng tatlong motorsiklo ang mga biktima subalit hinabol sila ni Reyes sakay ng kanyang Hyundai Accent (PQA 820) saka sinalpok ang mga biktima na parang pin ng bowling.?
Utas si Macadangdang habang tumilapon at nagpagulong-gulong sa kalsada ang mga kasamahan nito.?
Sumadsad sa bakanteng lote ang kotse kaya’t naaresto ng mga nagrespondeng pulis si Reyes kasama ang alalay na si Hugiebert Rivera Moico, 28.
- Latest