Karambola ng 5 sasakyan: 2 patay, 11 sugatan
LEGAZPI CITY, Albay, Philippines — Dalawa katao ang patay kabilang ang isang school principal habang 11 pa ang sugatan matapos magkarambola ang limang sasakyan sa kahabaan ng Maharlika Highway sa Brgy. Mabini, Libmanan, Camarines Sur kahapon ng umaga.
Kinilala ang mga nasawi na sina Leoncia Mangarin, 60-anyos, principal ng pampublikong paaralan sa Libmanan, ng Camella Homes, Brgy. Del Rosario sa Naga City at Ronel Pena Buenaagua, ng Pili.
Ginagamot sa Libmanan District Hospital ang mga sugatan na sina Francesca Abayo, 75; Socorro Adiova, 65; Felicidad Canet, 93, at Albert De Vera, 61; Susanne Maner, 34; Naoki William Pena, 9-buwang gulang, at lima pa na inaalam ang mga pangalan.
Sa ulat, alas-5:30 ng umaga, binabagtas ng Toyota Avanza (VQ-2943) ang highway na minamaneho ni Buenaagua nang sumalpok ito sa kasalubong na Tripolds bus (EVP-896) na minamaneho ng isang “Felimon” na tumakas makaraan ang aksidente. Nawalan umano ng kontrol ang bus sanhi upang bumangga ito sa itim na SUV (Ford Everest) na minamaneho ni Silvestre Mangarin.
Sa kasamaang palad, binangga naman ang SUV ng sumusunod na Philtranco bus (ABG-7609) na minamaneho ni Alex Candia, 39-anyos, kung saan sumalpok ito sa kanila ang sumusunod na truck (RHC-967) na minamaneho naman ni Arnold De Leon.
Ang namatay na si Mangarin ay lulan ng SUV Ford Everest habang si Buenaagua ang driver ng SUV Avanza na tumilapon sa labas ng kanyang sasakyan dahil sa lakas ng pagkakabangga. (Joy Cantos)
- Latest