2 ‘killer’ ng konsehal natimbog

MANILA, Philippines — Mabilis na nalutas ang kaso ng pamamaslang sa konsehal ng bayan ng Sariaya, Quezon matapos masakote ang dalawang sinasabing responsable sa krimen sa follow-up operations ng pulisya sa nasabing bayan kamakalawa.

 Kinilala ang mga nasakoteng suspek na sina Ramil Gesmundo at kapatid nitong si Reynaldo Gesmundo.

 Sa ulat, sinabi ni Police Regional Office (PRO) IV-A Director P/Chief Supt. Guillermo Eleazar ang dalawa ay nasakote pasado ala-1:10 ng hapon o tatlong oras matapos na paslangin ang biktimang si Sariaya Councilor Aristeo Ilao.

 Ayon kay Eleazar ang mga suspek ay mga bayaw ng biktimang si Konsehal Ilao na natukoy matapos na ituro ng mga testigo sa krimen.

 Nitong Huwebes, dakong alas-9:30 ng umaga nang pagbabarilin ng riding in tandem na mga salarin si Ilao sa tahanan nito sa Brgy. Sampaloc 2, Sariaya kung saan agad itong binawian ng buhay sa tinamong mga tama ng bala sa ulo.

 Samantala, agad namang nagsagawa ng follow-up operations ang mga awtoridad at nasakote ang mga suspek sa magkakahiwalay na lugar sa Brgy. Sampaloc 2 at Pinagbakuran sa kanilang bayan.

 Sa imbestigasyon, sinabi ng mga suspek na personal na galit ang nagtulak sa kanila para paslangin ang biktima.