PANOORIN: Pagnanakaw ng cellphone sa loob ng salon sa Cavite
Ilang mga netizen ang nakapagsabi na nakapambiktima na ang suspek sa lalawigan ng Rizal.
MANILA, Philippines – Kitang-kita sa kuha ng closed circuit television camera (CCTV) ang isang lalaki na sumalisi upang manakaw ang cellphone sa loob ng isang salon sa Imus City, Cavite.
Ayon sa ipinadalang video ni Jay Sortijas, may-ari ng salon, dali-daling pumasok ang kawatan sa loob ng establisyimento bandang alas-4 ng hapon nitong Lunes dala-dala ang isang solicitation letter.
Nang makapasok ay agad na kinausap ng kawatan ang babaeng anak ni Sortijas habang patingin-tingin sa loob ng establisyimento.
Nang tumalikod ang dalaga upang kumuha ng pera ay mabilis naman isinilid ng kawatan sa papel ang isang cellphone na nagkakahalaga ng P10,000.
Ayon kay Sortijas, matapos niyang i-post sa kanyang Facebook ang insidente ay may ilang mga netizen ang umano’y nakilala ang suspek at sinabing nakapambiktima na rin sa lungsod ng Rizal.
- Latest
