Jeepney hulog sa bangin: 2 dedo, 20 sugatan

MANILA, Philippines – Dalawa-katao ang iniulat na namatay habang 20 naman ang nasugatan makaraang mahulog ang pampasaherong jeepney sa malalim na bangin sa Barangay Parina, bayan ng Calanasan, Apayao kamakalawa ng hapon.

Sa inisyal na ulat ng Cordillera PNP na isinumite sa Camp Crame, dalawa sa mga pasahero na inaalam pa ang  pagkakakilanlan ay kapwa idineklarang patay sa Claveria Infirmary habang patuloy namang ginagamot ang 19 pasahero at driver ng pampasaherong jeepney.

Base sa imbestigasyon, bumabagtas sa highway ang PUJ  na may plakang VBS 886 na minamaneho ni Sonnyboy Alayao nang maganap ang trahedya bandang alas-3 ng hapon sa kahabaan ng national road.

Nawalan ng kontrol sa manibela ang driver habang bumabaybay sa matarik na highway kaya nagtuluy-tuloy na bumulusok sa malalim na bangin.