Negosyanteng biyuda, itinumba

TUGUEGARAO CITY, Cagayan, Philippines – Pinabulagta ang 42-anyos na negosyanteng biyuda matapos ratratin ng di-kilalang lalaki sa kanyang puwesto sa tindahan sa Barangay San Jose, bayan ng Narvacan, Ilocos Sur kamakalawa. ?Sa police report na isinumite kay P/Chief Insp. Rex Buyucan, hepe ng Narvacan PNP, tinangay ng gunman ang bag na naglalaman ng malaking halaga at cellphone ng biktimang si Rosalie Cacho. Nabatid na abala ang biktima sa pag-aayos ng mga paninda nang lapitan at barilin sa harap ng kanyang 6-anyos na anak na lalaki. ?Bukod sa anggulong pagnanakaw, sinisilip ng pulisya ang kaugnayan sa pagpaslang sa mister ng biktima noong nakalipas na eleksiyon. Pinaniniwalaang dating manliligaw ng biktima ang gunman na kanyang binasted.