Encounter: rebelde todas

CAMP SIMEON OLA, Legazpi City, Philippines –Isa na naman na miyembro ng rebeldeng New People’s Army ( NPA ) ang nasawi matapos muling makasagupa ang tropa ng mga sundalo sa Brgy. Gabao, Irosin, Sorsogon kaugnay ng patuloy na operasyon ng militar.

Sa report ni Army’s 903rd Brigade Commander Col. Joselito Kakilala, bandang alas-5:50 ng umaga ng makasagupa ng mga tauhan ng Army’s 31st Infantry Battalion (IB) ang grupo ng mga rebelde kaugnay ng hot pursuit operation matapos ang bakbakan sa Juban, Sorsogon noong Hulyo 4.

Napaslang sa bakbakan ang isang rebelde na inabandona ng mga nagsitakas nitong kasamahan.

Samantala, kinumpirma ng militar kahapon na kabilang rin sa matataas na opisyal na napatay sa engkuwentro sa Juban ay ang Spokesman ng Celso Mengues Command na si Franky Joe Soriano alyas Gregorio Banares.

Nitong Biyernes ay una ng tinukoy ng militar na kabilang sa 8 napaslang na rebelde ay ilang matataas na lider   sa pangunguna ni Arnel Astiller alyas Ka Ariston; Jackelyn Manay, misis ni Ka Greg na graduate sa University of the Philippines, isang alyas Ka Abby, top 10 sa nursing board exam noong 2012; alyas Ka Dado, Commander ng NPA at iba pa.