4 sugatan sa ambush

BATANGAS, Philippines – Apat  katao kabilang ang dalawang brgy. chairman, isang konsehal at isang sibilyan ang nasugatan matapos tamba­ngan ng riding in tandem sa Nasugbu, Batangas kamaka­lawa ng hapon.

Kinilala ni Supt Renato Mercado, hepe ng Nasugbu Police ang mga biktimang sina Marlon Limbog, Chairman ng Brgy Papaya at Chairman Magno Cabasis ng Brgy Butucan; pawang sa bayang ito.

Sugatan din si Brgy. Konsehal Maria Socorro Yumong at pamangkin nitong si Priscila Benavides matapos na magtamo ng mga tama ng baril sa katawan.

Ayon sa opisyal , sakay ng isang L200 pick up na may plakang TTG-225 ang mga biktima at papauwi na matapos dumalo ng Unity Walk for Peace Covenant nang tambangan at pagbabarilin sa may JP Laurel St. Bgy 9, Nasugbu ,Batangas bandang alas-5:45 ng hapon

Isinugod sa Dela Salle Hospital sa Dasmariñas, Ca­vite ang mga biktima para malapatan ng lunas. Inaalam pa ng mga awtoridad ang motibo ng pananambang.