SAN LEONARDO, Nueva Ecija, Philippines – Dalawa ang iniulat na namatay at dalawa rin ang nasugatan makaraang mabangga ang sinasakyan ng mga itong motorsiklo ng kasalubong na pickup sa kahabaan ng San Anton-Jaen provincial road, Brgy San Antonio sa bayang ito, kamakalawa ng gabi. Kinilala ng pulisya ang dalawang nasawi na sina Clinton Flaminiano, 18, 2nd year college student; at tiyahin nitong si Aquilina Panigbatan, 56, biyuda, kapwa ng Barangay Langla, Jaen, Nueva Ecija. Isinugod naman sa Gonzales General Hospital ang sugatang sina Carlito Pascual, 20; at Richard Ronquillo, 26, kapwa may-asawa ng Brgy. Tabuating ng bayang ito. Naaresto naman ang driver ng Isuzu pick-up (BMS-800) na si Alexander Diaz, negosyante ng Brgy. San Josef Nabao, Jaen ng lalawigan Sa imbestigasyon, nabatid na dakong alas-6:45 ng gabi, ang dalawang nasawi ay sakay ng motorsiklong Suzuki Raider (8577-GD) at dalawang sugatan na sakay naman ng Honda Wave (HL-9577) ay kapwa patungo sa bayan ng Jaen nang biglang mabangga ng kasalubong nitong pick-up na patungo naman sa Maharlika Highway.