MANILA, Philippines - Isang 10-anyos na batang babae ang iniulat na nasawi makaraang mabigti sa pinaglaruang lubid ng duyan sa kanilang tahanan sa Barangay Malacanang, San Carlos City, Pangasinan kamakalawa ng hapon.
Sa phone interview, kinilala ni San Carlos City PNP director P/Supt. Marlon Tayaba, ang nasawing biktima na si Apple de Vera, Grade V pupil at residente sa nasabing barangay.
Sa salaysay ng ama ng bata na si Romulo de Vera, iwanan nilang mag-asawa ang anak habang naglalaro dahil may kailangan silang asikasuhin sa kanugnog na bayan.
Gayon pa man, pagbalik ng mag-asawa ay madatnan nilang patay na ang anak matapos mapulupot sa leeg nito ang lubid ng duyan.
May teorya naman ang mag-asawa na aksidenteng naitali ng bata ang lubid ng duyan sa leeg dahil mahilig itong sumabit kapag naglalaro na nagpapaikot-ikot pa ang katawan.
Nagkataon namang walang kasama sa kanilang bahay ang bata kaya walang makapagsabi kung ano ang tunay na pangyayari.
Sa post mortem examination sa bangkay ng bata, lumilitaw na wala namang palatandaang nanlaban o pumalag ang biktima kaya walang naganap na foul play.