MANILA, Philippines - Limang pulis at dalawang sibilyan ang iniulat na nasugatan makaraang sumalpok ang mobile patrol car sa puno ng acacia na nasa gilid ng Maharlika Highway sa Barangay Tagbayaon sa bayan ng Jiabong, Samar, ayon sa ulat kahapon. Kabilang sa mga naisugod sa Samar Provincial Hospital ay si PO2 Dennis Delorino, tatlo pa nitong kasamahang pulis habang sa Bethany Hospital sa Tacloban City naman si PO1 Reynaldo Gamay na nasa malubhang kalagayan. Sa ulat na nakarating sa Camp Crame, lulan ng Toyota Innova (SIX 982) na may body number (510) ang mga biktima patungo sa bayan ng Calbiga nang mawalan ng preno sa pakurbada at pababang bahagi ng highway saka sumalpok sa punongkahoy.