QUEZON, Philippines — Halos maputol ang leeg at namatay noon din ang isang magsasaka matapos na ito ay gilitan ng leeg ng kanyang manugang dahil lamang sa pagkakagising sa pagtulog, kamakalawa ng umaga sa Barangay Cabungalan sa bayan ng Burdeos, Quezon. Kinilala ng pulisya ang napaslang na si Menandro Alarma habang sumuko naman kay Barangay Councilor Ariston Delgara ang suspek na si Jonald Samodio, 29. Ayon kay PO1 Julyaser Abdurasid, mahimbing na natutulog ang biktima nang dumating ang manugang nito na may bitbit na sako ng bigas. Ibinagsak ng suspek ang bigas sa sahig na naging sanhi upang magising ang biktima. Dahil dito ay kinumpronta ng biktima ang manugang hanggang sa mauwi sa suntukan at nang matalo ang suspek ay pumunta ito ng kusina at kumuha ng gulok saka isinagawa ang krmen.