KIDAPAWAN CITY, Philippines – Pitong sundalo ng Bravo Company sa ilalim ng 57th Infantry Battalion ng Philippine Army ang nasugatan makaraang sumabog ang landmine na itinanim ng mga rebeldeng New People’s Army sa bisinidad ng Barangay Binay, sa bayan ng Magpet, North Cotabato, kahapon ng tanghali.
Sa ulat ni Major Leo Diaz, kumander ng 57th Infantry Battalion, kabilang sa mga sugatan na naisugod sa Kidapawan Medical Specialist Center ay sina Marlo Janolino, Puertido Magbanua, Roderick Ottok, Elvis Braga, Roger Espiritu, Renato Tupaz, at isang ‘di pa kilalang sundalo.
Nabatid na pauwi na ang military vehicle (SJE 115) ng mga biktima sa Barangay Binay, nang sumambulat ang bomba kung saan tinamaan ang dalawang gulong ng sasakyan. - Malu Manar