Labor leader tiklo sa extortion
LAGUNA – Naaresto ng mga operatiba ng National Bureau of Investigation ang isang nagpakilalang labor leader sa isinagawang entrapment operation kaugnay sa pangingikil nito sa isang hauling company kamakalawa ng umaga.
Kinilala ni Atty. Olivo Eboy Ramos, hepe ng NBI Laguna District Office (LAGDO), ang suspek na si Lilioso “Leo” Cayosa, 51, ng Block 18 Lot 41 Southway Fairway, NMS, Landayan, San Pedro, Laguna.
Inaresto si Cayosa matapos magpakilalang national president ng Samahan Ng Lahat ng Manggagawang Independiente (SALAMIN) at sinasabing nanghihingi ng P.120-milyon sa San Antonio Haulers, Inc. kapalit ng hindi nito pagsasampa ng labor case laban sa kompanya.
“Ang modus operandi ni Cayosa ay magre-represent bilang adviser ng mga kawani ng kompanya tapos siya ang mag-iinitiate ng pag-papa-file ng labor case sa National Labor Relations Commision (NLRC) at sikretong makikipag-negotiate sa company kapalit ng malaking halaga para iatras ang kaso,” pahayag ni Ramos.
Noong Agosto 2008, sa kabila ng hindi kabilang na kawani si Cayosa sa San Antonio Haulers, siya ang nag organisa nito ang Samahan ng Lahat ng Manggagawang Independiente sa San Antonio Haulers, Inc. at nairehistro sa Department of Labor and Employment (DOLE), Region IV sa Calamba City.
Napag-alamang nagpalabas ng resolusyon ang labor union ng Salamin-San Antonio na tinatanggal na si Cayosa bilang labor adviser.
Gayon pa man, pilit pa rin nanghihingi si Cayosa ng malaking halaga sa may-ari ng kompanya na si Bernardo Almendrala hanggang sa humingi ito ng tulong sa NBI.
Nadakip si Cayosa habang tumatanggap ng pera kay Almendrala sa isang foodchain sa Laguna. (Arnell Ozaeta)
- Latest
- Trending
