Cotabato ‘binabaha’ ng water lily
Nababahala na ang National Disaster Coordinating Council sa patuloy na pagbaha sa 75 porsyentong lupain ng Cotabato City na idinulot pa noon ng bagyong Frank dahil sa pagdami ng ekta-ektaryang “water lily”.
Sa pinakahuling ulat ng NDCC, nagsisilbi pa ngayong dam ang napakakapal na mga water lily na nagpabago sa pagdaloy ng tubig-baha sa ilog ng Rio Grande de Mindanao patungo sa mas mababang lugar sa lungsod.
Umaabot na umano sa pitong ektarya ang lawak at tatlong metro ang kapal ng mga water lily.
Umaabot na rin sa 14,014 pamilya ang patuloy na naapektuhan ng pagbaha habang 3,058 pamilya ang patuloy pa ring nanunuluyan sa mga 13 evacuation areas.
Sa Iloilo, kakailanganin pa ng apat hanggang anim na buwan upang maayos na tumakbo ang mga “water system” dahil sa nahihirapan pa rin ang mga awtoridad na kumpunihin ang mga linya ng tubig, habang sa Aklan naman ay maayos nang gumagana ang Metro Kalibo Water District pumping station ngunit patuloy pa ring ipinapaalala sa mga residente na pakuluan ang kanilang iinuming tubig. (Danilo Garcia)
- Latest
- Trending