KIDAPAWAN CITY – Bumagsak sa kamay ng mga awtoridad ang isa pang lider ng Al Khobar Extortion Group na responsible sa pambobomba sa Central Mindanao sa isinagawang operasyon sa bayan ng Pres. Quirino sa Sultan Kudarat noong Huwebes.
Sa bisa ng warrant of arrest na inisyu ni Judge Rogelio Naresma ng Cotabato Regional Trial Court Branch 23, dinakip ng mga tauhan ng Cotabato PNP at Kidapawan City Special Weapons and Tactics, ang suspek na si Musali Gardo 35, na gumagamit ng mga alyas Musali Cado, Musalim Abas at Dyanggo.
Si Gardo ay isa sa 30 miyembro ng Al Khobar na kinasuhan ng murder, multiple frustrated murder at multiple attempted murder kaugnay ng pambobomba sa isang mall sa Kidapawan City noong Nov 22, 2007.
Ayon sa ulat, kasama ni Gardo sa pambobomba sa KMCC Mall sina Muhalidin Hassan at Alex Sanduyugan na inaresto noong Nov 22, 2007, ilang oras pagkatapos ang bombing.
Sumunod na nasakote si Melvin Claro na pinaniniwalaang financial conduit ng Al Khobar na inaresto noong February 8, 2008.
Sa panayam ng PSN NGAYON, inamin ni Gardo na kasama siya sa lumusob sa Cotabato provincial rehabilitation center sa bayan ng Amas noong Feb 2, 2007 na nagresulta para makatakas ang 48 preso, kabilang na ang mga may kasong extortion, kidnapping at mga pagpatay bunga ng mga pambobomba. Kasalukuyang sumasailalim sa tactical interrogation si Gardo sa Kidapawan PNP.