Mag-asawa, anak gutay sa granada

CAMP VICENTE LIM, Laguna – Masaklap na ka­matayan ang sinapit ng mag-asawa at anak nilang lalaki makaraang masabu­gan ng granada sa loob ng ka­nilang tahanan sa Sitio Culanga, Barangay Pob­lacion sa bayan ng Taytay, Palawan nong Martes ng madaling-araw.

Kabilang sa mga bikti­mang namatay ay sina Julito Barbon, 32, mangi­ngisda; asawa nitong si Emily, 28; at kanilang anak na si John Paul, 3, pawang residente ng nabanggit na barangay.

Gutay ang katawan nina Emily at John Paul matapos masabugan ng granada, samantalang namatay na­man si Julito habang gina­gamot sa Taytay  District Hospital.

Sa inisyal na ulat ng 413rd Police Mobile group na isinumite kay P/Senior Supt. Dennis Peña, Pala­wan police director, suma­bog ang granada matapos laruin ni John Paul at aksi­den­teng natanggal ang safety pin ng granada ma­tapos na paglaruan ni John Paul sa loob ng kanilang bahay bandang alas-2 ng madaling-araw.

Sa panayam naman ng PSN kay P/Supt. Peña, may posibilidad na si Julito ay hindi sinaway ang kanyang anak sa paglalaro ng gra­nada dahil namataan ng ilang kapitbahay na lango sa alak bago naganap ang trahedya.

“Una nga naming naku­hang impormasyon ay dina­mita ang sumabog dahil ma­ngingisda si Julito, pero may nakuha kaming safety lever ng granada,” dagdag pa ni Peña.

Patuloy ang imbestigas­yon ng Palawan police para matukoy ang tunay na dahi­lan ng pagsabog.