Van vs. bus: 3 patay

NUEVA ECIJA — Tatlong sibilyan ang kumpirmadong nasawi, habang tatlo pa ang nasa kritikal na kondisyon makaraang magsalpukan ang pampasaherong bus at van ng mga biktima sa kahabaan ng Maharlika Highway na sakop ng Sitio Kalasingan sa Barangay Joson, Carranglan, kamakalawa ng umaga.

Isa sa mga biktima ay nakilalang si Anthony Nicolas, 27, ng Brgy. San Isidro sa bayan ng Paombong, Bulacan habang ang dalawang babae na nasawi ay bineberipika pa ang pagkikilanlan.

Kasalukuyan pang ginagamot sa Premiere General Hospital ang mga malubhang sugatang biktima na sina Generoso Gomez, 50; Edgar Gonzals, 59; at Narcisa Gonzales, 47, na pawang residente ng Bulacan.

Sumuko naman sa pulisya ang drayber ng Norton Transit Bus (BVJ-896) na si Saldo Camsol, 45, ng La Trinidad, Beguet.

Napag-alamang dadalaw sana ang mga biktima sa kanilang kaanak ng maganap ang malagim na sakuna. (Ulat ni Christian Ryan Sta, Ana)