Mister iniwan ng lover, hinostage ang 4 na pamangkin
MANILA, Philippines — Apat na kabataan ang hinostage ng kanilang tiyuhin matapos maaburido nang hiwalayan ng kanyang live in partner, naganap kamakalawa ng hapon sa Sta. Ana, Maynila.
Nailigtas ng mga otoridad ang mga biktima na sina Jay Ann Pila, 26; Alexis Ilagan, 18; Alexander Ilagan, 15; at Charlotte Yanos, 16, pawang nakatira sa No. 605 Champaca St., Punta, Sta. Ana, ng lungsod.
Sa ulat, alas-3:00 ng hapon nang umpisahang bihagin ng suspek na si Robert Buhisan, 34, ang kaniyang mga pamangkin sa loob ng bahay habang armado ng isang gunting.
Habang hostage ang mga pamangkin ay nanawagan ito na makipagbalikan sa kaniya ang kaniyang dating kinakasama.
Nakipagnegosasyon ang mga pulis sa suspek sa pangunguna ni PLtCol Orlando Mirando Jr., katuwang si MPD Director PBGen Andre Dizon.
Nang makakuha ng tiyempo ay nagawang madakma ng mga pulis ang suspek at natapos ang hostage drama.
Nabatid na sumasailalim umano sa depresyon ang suspek nang layasan ng kaniyang live-in partner ilang buwan na ang nakalilipas.
- Latest
