Higit 1,000 OFWS stranded sa Dubai
Dahil sa travel restrictions sa Pinas
MANILA, Philippines — Iniulat kahapon ng Konsulada ng Pilipinas sa United Arab Emirates na mahigit 1,000 overseas Filipino workers (OFWs) sa Dubai ang hindi makauwi sa bansa matapos ang kanselasyon ng biyahe ng mga eroplano dahil sa ipinatutupad na travel restrictions sa Pilipinas.
Kinumpirma ni Consul General Paul Raymund Cortes sa isang panayam na mahigit na sa 1,000 na OFWS ang kasalukuyang stranded sa Dubai.
Ayon pa kay Cortes, ang mga OFWs ay nasa pangangalaga ngayon Philippine Consulate General sa Dubai.
Nabatid na kinansela ang mga biyahe noong Mayo na pinalawig hanggang Hunyo 30 bilang pag-iingat laban sa mas nakakahawang variant ng COVID -19.
Matatandaan na inanunsiyo ni Presidential Spokesperson Harry Roque na inaprubahan ng gobyerno ang pagpapalawig ng travel restrictions sa mga biyahero mula sa India, Pakistan, Bangladesh, Sri Lanka, Nepal, United Arab Emirates, at Oman hanggang Hunyo 30, 2021.
Samantala, sinabi ng Department of Health na dapat maiwasan na maging dominant ang Delta variant sa bansa na unang nakita sa India kaya dapat maging mahigpit ang pagbabantay sa mga borders.
Ayon kay Health Undersecretary Maria Rosario Vergeire, dapat na ipatupad ang mga preventive measures upang maiwasang mangyari sa Pilipinas ang nangyayari sa ibang bansa na nagkakaroon muli ng pagtaas ng kaso ng COVID -19 dahil sa Delta variant. - Ludy Bermudo
- Latest