DOLE naglaan ng 10K emergency jobs sa mga taga-Isabela at Cagayan

MANILA, Philippines — Sa ilalim ng TUPAD (Tulong Panghanapbuhay sa Ating Disadvantaged/Displaced Workers) program ay naglaan ang Department of Labor and Employment (DOLE) ng 10,000 trabaho para sa mga residente ng lalawigan ng Isabela at Cagayan na naapektuhan ng matinding baha dulot ng bagyong Ulysses.

Sinabi ni Labor Secretary Silvestre Bello III na binigyan na nilang otoridad ang mga pamahalaang panlalawigan ng Isabela at Cagayan na tumanggap ng mga manggagawa sa ilalim ng TUPAD.

“Doon naman sa TUPAD, ito ‘yung emergency employment program, binigyan po namin ng authority si Governor Mamba na mag-hire ng 5,000 tao para maglinis at mag-ayos sa lalawigan ng Cagayan,” ayon kay Bello.

Pangunahing gagawin ng mga makukuha sa TUPAD ay ang paglilinis sa mga apektadong lugar sa mga tambak na putik, nasirang mga imprastraktura at mga nagkalat na debris.