Sekyu nambu-bully ng kabaro, dinedo
MANILA, Philippines — Tinapos na ng isang sekyu ang pambu-bully sa kanya ng kabaro nang ito ay barilin niya kamakalawa ng gabi sa loob ng isang bodega ng bigas sa Tondo, Maynila.
Ang biktima na hindi na umabot ng buhay sa ospital ay nakilalang si Steven Morales, security guard sa RAN PMC Compound at residente ng No. 27 St. Anthony Phase-2 A, Antipolo City, Rizal.
Arestado naman ang suspek na si Lemuel John Estriba, 29, ng Barangay Camangyanan, Sta. Maria, Bulacan.
Sa ulat bago naganap ang krimen, alas-7:10 ng gabi sa loob ng nasabing compound sa No. 1613 A. Rivera St., kanto ng Mayhaligue St., Tondo ay naka-duty ang suspek nang lapitan ng biktima at ilang ulit na sinabihan ng “Umayos ka malapit ka na sa akin!” hanggang sa bumalik na sa kaniyang assigned post ang biktima.
Napikon at nagdilim ang isip ng suspek at siya naman ang nagtungo sa pwesto ng biktima at doon ay hindi na napigilan at pinaputukan ng ilang beses na dahilan upang bumagsak at isinugod sa ospital, subalit idineklarang dead on arrival.
Agad na naaresto ang suspek at sinabi na hindi na niya kinaya ang ginagawang pambu-bully ng biktima kaya’t pinatay na niya ito.
- Latest