‘Man in black’ sa Jolo shooting iimbestigahan
NBI: Crime scene ginalaw…
MANILA, Philippines — Kwestiyonable ngayon ang nasaksihan sa CCTV footage na umano’y ‘man in black’ na gumalaw sa katawan ng isang sundalong napatay sa pamamaril sa Jolo, Sulu.
Ayon kay PBA Partylist Rep. Jericho Nograles, dapat ipaliwanag ng pulisya kung sino si “man in black” na malinaw na nakita sa CCTV footage sa lugar na ginalaw ang crime scene, ang ulo ng mga bangkay at maging ang behikulo na sinasakyan ng apat na sundalong nasawi.
“Who is the man in black sa video, ginalaw ulo ng mga corpse, sumilip sa kotse may kinukuha sa sling bag, may inilalagay sa loob at nakunan ito sa CCTV”, ayon kay Nograles na aniya’y isang malinaw na pagta-tamper ng mga ebidensya matapos nitong mapanood ang video.
“ Sa CCTV footage, me gumalaw sa crime scene, sa pag-tamper ng crime scene may itinatago and that is a premeditation to murder, di mo puwede sabihin judgement call dahil wala namang banta sa buhay ng mga pulis “, anang solon.
Iniimbestigahan na rin ng National Bureau of Investigation (NBI) ang naturang CCTV footage kung saan makikita ang lalaking nakaitim na nakasuot ng sumbrero na tila may inilagay siyang kung ano sa bangkay at inililipat ang pwesto ng kinabagsakan nito.
Sinabi pa ni Nograles na si Major Marvin Indammog, team leader ng Army Intelligence sa Army’s 11th Infantry Division (ID) ay nagtamo ng 12 tama ng punglo sa katawan, apat sa harap at 8 sa likurang bahagi na kumitil sa buhay nito.
Sinabi ni Nograles na malinaw sa video footage na lumabag sa Manual Operating Procedure ng PNP ang mga pulis sa checkpoint.
Hindi rin aniya ito isang ‘isolated case’ dahilan, isang dekada na ang nakalilipas ay may binaril rin sa lugar ang mga pulis sa kaparehong kalsada sa kapitolyo ng Sulu mula sa Marine Battalion Landing Team (MBLT) na kanilang napatay.
- Latest