ABS-CBN, walang intensiyong ipasara ng Kongreso
MANILA, Philippines — Tiniyak ni House Speaker Alan Peter Cayetano na walang intensyon ang Mababang Kapulungan ng Kongreso na ipasara ang ABS-CBN network na tatlong araw na lang ang mapaso ang prangkisa nito.
Ito ay sa gitna na rin ng Enhanced Community Quarantine (ECQ) sa ilang mga piling lugar sa bansa partikular na sa Metro Manila bunga ng krisis sa kalusugan dulot ng coronavirus disease 2019 (COVID-19).
Nakabimbin pa sa Mababang Kapulungan ang 11 panukalang batas para sa extension ng karagdagan pang 25 taon sa prangkisa ng ABS-CBN na mage-expire na sa Mayo 4 o sa pagbubukas muli ng sesyon.
Sinabi ni Cayetano, iginagarantiya niya ang patas na pagdinig sa prangkisa ng higanteng television network, pero iginiit na karapatan ng mga nagrereklamo na ibigay ang kanilang panig kung sa tingin nila ay nagamit sa pulitika ang ABS-CBN partikular na noong nakalipas na 2016 presidential election sa bansa.
Ang 11 panukalang batas para sa pagpapalawig ng prangkisa ng ABS-CBN ay nakabimbin sa House Committee on Legislative Franchises simula pa noong Agosto 2019 kung saan ang panel ay nagsagawa ng inisyal na pagdinig dito noong Marso 10.
- Latest
