Sanggol lunod sa imbakan ng tubig

MANILA, Philippines — Hindi na umabot nang buhay sa ospital ang isang 1-anyos na sanggol na lalaki na si “Baby Alvin” nang mahulog at malunod sa imbakan ng tubig na plastic container sa labas ng kanilang bahay sa Brgy. Tuburan, Ligao City, Albay kamakalawa ng hapon.

Sa pahayag ni Capt. Dexter Panganiban, tagapagsalita ng Albay Police, alas-3:30 ng hapon ay humingi ng tulong sa mga pulis na nasa quarantine checkpoint sa Brgy. Tuburan ang isang lalaki dahil nawawala ang kanyang sanggol na anak.

Agad rumesponde ang mga pulis at sa ilang minutong paghahanap ay natagpuan ng tatay ang anak na wala nang ulirat habang nakasubsob sa loob ng plastic water container na may taas na isang metro at may lamang kalahating tubig katabi lang ng main door ng kanilang bahay.