PCSO GM ipapatawag ng kongreso
MANILA, Philippines — Nakatakdang ipatawag ng Committee on Games and Amusement ng Kongreso si PCSO General Manager Royina Garma para hingin ang kanyang paliwanag kung bakit pinayagan nito na muling mag-operate ang Peryahan ng Bayan.
Ayon kay ACT-CIS Cong. Eric Yap, Chairman ng Committee on Games, nais nilang malaman kung saan kumuha ng authority si Garma para muling buksan ang Peryahan ng Bayan na may utang pa sa PCSO.
“Magugulo lang ang mga palaro ng PCSO dahil may STL na, tapos may peryahan pa. Pareho lang ang konsepto ng kanilang laro,” wika ni Yap.
Sinabi ni Cong. Yap, bubuksan ang inquiry sa December 17, 2019 kasama ang lahat ng miyembro ng Committee on Games.
Sa rekord na nakuha ng ACT-CIS mula mismo sa PCSO, mas malaki ang binabayad na revenue ng STL kaysa sa Peryahan.
“Halimbawa na lang sa Pangasinan, P38 milyon ang nireremit ng STL sa PCSO habang ang Peryahan ay P1.5 milyon lang sa isang buwan. Malinaw na ang may-ari lang ng Peryahan ang kumikita,” pahayag pa ni Cong. Yap.
Nais marinig ng Kongreso ang dahilan ni Garma para buksan muli ang Peryahan ng Bayan.
- Latest