Walang mass transport crisis sa Metro Manila - Palasyo
MANILA, Philippines — Kinumpirma ng Palasyo na mayroong umiiral na traffic crisis sa Metro Manila pero nanindigan na walang mass transport crisis sa kasalukuyan.
Ito ang binigyang-diin ni Presidential Spokesman Salvador Panelo sa media briefing matapos itong kumasa sa commute challenge sa kanya ng mga aktibista.
“There is a traffic crisis. Mas matindi ngayon ang traffic situation pero walang mass transport crisis dahil wala namang paralysis,” wika pa ni Sec. Panelo.
Nilinaw din ni Panelo na ginagawan na ng solusyon ng gobyerno ang nararanasang krisis sa trapiko sa Metro Manila sa pamamagitan ng Build, Build, Build projects.
Isa rin sa nakikitang solusyon ni Panelo upang mapaluwag ang trapiko sa Metro Manila ay ang pagbabawas ng mga lumang sasakyan sa kalsada, at pagtatayo ng mas maraming skyways.
Magugunita na inabot ng halos apat na oras si Panelo nang mag-commute ito papasok sa Malacañang mula sa Marikina City nang sumakay ng apat na jeep at motorsiklo bago makarating sa kanyang opisina.
- Latest