PDEA agent sinalvage

MANILA, Philippines — Natagpuang patay at may mga tama ng bala sa mukha at katawan ang isang Assistant Provincial Officer ng Philippine Drug Enforcement Agency (PDEA) sa ilalim ng isang kanal kahapon ng umaga sa Brgy. Napolidan, Lupi, Camarines Sur.

Ang biktima ay kinilalang si PDEA Agent ­Enrico Barba na nakatali ang mga kamay at nakabalot ng ­packaging tape ang mukha nang ito ay matagpuan dakong alas-10:00 ng umaga.

Nabatid na nakita ng mga dumadaang residente ang bangkay ng biktima kaya’t ipinagbigay alam nila ito sa barangay na siya namang tumawag sa mga pulis.

Nakuha ng mga rumespondeng pulis sa bulsa ng biktima ang mga katagang “Wag Tularan, Tulak Ako”.

Sinabi naman ni PDEA Regional Director Christian Frivaldo na hinanap niya ang biktima noong Linggo ng alas-12:00 ng hatinggabi para sana ito ang kumausap sa kanilang informer hinggil sa kalakaran ng droga sa bayan ng Daet.