Kongreso ‘di pwedeng pilitin ang Presidente na isiwalat ang medical records
MANILA, Philippines — Malaki ang paniwala ni senatoriable Rafael Alunan na walang karapatan ang sinoman na pilitin ang Pangulo ng bansa na isapubliko ang kanyang kondisyong pangkalusugan kahit ito pa ay ang Kongreso.
Ito ang inihayag ni dating Interior and Local Government Secretary Alunan na hindi maaaring i-pressure ng Kongreso si Pangulong Rodrigo Duterte na isiwalat sa publiko ang kanyang kalagayang pangkalusugan.
Sa halip ay maaari lamang makiusap ang Kongreso kung ano ang totoong medical condition ng Pangulo ngunit, sa huli ang Pangulo pa rin ang may desisyon kung isasapubliko ito o hindi.
“Because the 3 branches of the government are equal parts so we can’t compel the Office of the Executive, rather we can request the Office of the President. And it’s up to the Office of the Executive if they want to reveal or not,” paliwanag ni Alunan.
Noon pa man ay marami nang kumukuwestiyun sa lagay ng kalusugan ng Pangulo at kung kakayanin pa niyang tapusin ang kanyang termino hanggang 2022.
Kamakailan, kumalat ang isang fake news na nagsasabing patay na ang Pangulo na tinawanan lang ng Palasyo.
Sakaling palarin sa Senado, isa sa isusulong ni Alunan ay mapanagot ang sinumang hindi maingat sa paglalabas ng impormasyon hinggil sa ating Punong Ehekutibo.
- Latest
