Bigtime ‘tulak’ tiklo

MANILA, Philippines — Arestado ang isang sinasabing bigtime na ‘tulak’ ng droga matapos masakote at makumpiskahan ng nasa mahigit dalawang kilo ng shabu na may halagang nasa P11-milyon sa buy-bust operation na isinagawa ng mga otoridad sa Brgy. Pasong Camachili 2, sa lungsod ng Gen. Trias, sa lalawigan ng Cavite, kamakalawa.

Ang suspek ay kinilalang si Sariff Macmod Kaurak, alyas “Jhony”, 42, taga-Maguindanao, at residente ng Pasong Buwaya, Imus City, Cavite.

Sa ulat ng pulisya, dakong alas-4:00 ng hapon nang ikasa ang operasyon laban sa suspek matapos itong magpositibo sa ilegal na gawain makaraang isailalim sa ilang araw na surveillance.

Isang pulis ang tumayong buyer at nakipag-transaksyon sa P200,000 halaga ng shabu.

Nang magpositibo ang buy-bust, dito ay agad nang dinakma ng mga pulis ang suspek at nakuha mula sa kanya ang isang malaking plastic na may lamang shabu at 16 na piraso ng maliliit na plastic sachet na naglalaman din ng shabu na may kabuuang timbang na 2 kilo at tinatayang nagkakahalaga ng P11-milyon.