Lucas Bersamin ang bagong Chief Justice
MANILA, Philippines — Itinalaga ni Pangulong Rodrigo Duterte si Lucas Bersamin bilang bagong Chief Justice ng Supreme Court.
Papalitan ng 69-anyos na si Bersamin si Teresita Leonardo-De Castro na nagretiro sa serbisyo noong Oktubre matapos na magserbisyo ng 41 araw matapos na masibak si Maria Lourdes Sereno.
Si Bersamin ay naging judge ng Quezon City Regional Trial Court Branch 96 noong 1986 at noong 2003 ay itinalaga naman siya ni dating Pangulong Gloria Macapagal-Arroyo para maging Court of Appeals associate justice.
Manunungkulan si Bersamin bilang Punong Mahistrado kulang isang taon o hanggang sa umabot ito sa kanyang retirement age na 70 sa Oktubre 18, 2019.
Bumoto si Bersamin pabor sa pagpapalibing kay dating Pangulong Ferdinand Marcos sa Libingan ng mga Bayani at petisyon para mapatalsik si dating Chief Justice Maria Lourdes Sereno dahil sa kabiguan nitong mag-file ng SALN.
Si Bersamin din ang sumulat ng desisyon ng Korte Suprema na nagpapawalang sala sa plunder case ni dating Pangulong Arroyo at pumayag na makapagpiyansa si dating Senate President Juan Ponce Enrile na may kasong kinakaharap na plunder kaugnay ng pork barrel scam.
- Latest
