Solon pumalag sa ‘common tower’ policy ng DICT
MANILA, Philippines — “I think it’s not fair”.
Ito ang mariing tugon ni House Minority Leader at Quezon province Rep. Danilo Suarez na tinutulan ang nilulutong polisiya ng Department of Information and Communications Technology (DICT) na pag-aalis sa mga local telecom company ng responsibilidad na magtayo at mag-operate ng sarili nilang cell sites na tinatawag na “common tower” policy na nais ipatupad.
Ayon kay Suarez, para makatipid-tipid ay mas mabuting gamitin na lamang ang ‘backbone’ ng TransCo (National Transmission Corporation).
Hindi sang-ayon si Suarez sa panukala ng DICT na ibigay sa “independent company” ang pagpapatayo at operasyon ng mobile phone at telecommunications towers, na siya ring nais na mangyari na ipinagtatanggol pa ni Presidential Adviser on Economic Affairs and Information Technology Communications Ramon Jacinto.
Una nang nagkaroon ng mainit na pagtatalo sa pagitan nina Jacinto at Globe Telecom General Counsel at Senior Vice President Froilan Castelo sa isinagawang kauna-unahang public consultation ng DICT hinggil sa ipinapanukala nito.
Nagpahayag ng pagdududa si Castelo kung papaano magiging mabilis ang proseso sa pagtatayo ng cell sites kung ito ay ibibigay sa isang independent tower provider.
Sa karanasan, umaabot ng hanggang walong buwan ang kanilang hinihintay sa pag-apruba ng kanilang permit, partikular sa local government units para makapagpatayo ng kanilang tower.
Nabatid na sa ilalim ng ‘common tower” policy ay target ng DICT na magkaroon ng karagdagang 50,000 cell sites at sa unang apat na taong pagpapapatupad nito ay dalawang independent companies lamang muna ang papayagang maging tower providers.
- Latest