Parolado tinadtad ng bala
MANILA, Philippines — Dead-on-the-spot ang isang parolado nang siya ay pagbabarilin ng hindi pa kilalang mga suspek kahapon ng umaga sa Caloocan City.
Ang napatay na biktima ay kinilalang si Cezar Ruiz, 38, may-asawa, jobless at naninirahan sa San Vicente Street, Brgy. 178, Camarin.
Sa ulat ng Caloocan City Police, alas-5:00 ng umaga nang makita ang duguang bangkay ni Ruiz sa isang eskinita sa Block 30 Mangga Street, Area D, Brgy. 178.
Ayon sa pahayag ng isang Rea Bernas, nakarinig sila ng magkakasunod na putok ng baril at nang tumahimik ay binuksan nila ang bintana ng kanilang bahay at nakita ang nakahandusay na biktima.
Agad nilang iniulat ito sa mga opisyales ng kanilang barangay na siyang tumawag ng responde sa Police Community Precinct 5.
Ayon sa kapatid ng biktima na si Reynaldo Ruiz, dating nasangkot sa carnapping at nahatulan na sa korte na nakalaya noong isang taon matapos mabigyan ng parole.
- Latest