Trillanes kakasuhan ng sedisyon
MANILA, Philippines — Nakatakdang sampahan ng panibagong reklamong inciting to sedition si Senator Antonio Trillanes IV sa mga susunod na araw dahil sa umano’y pambabastos nito kay Pangulong Rodrigo Duterte at panghihikayat sa mga sundalo na mag-aklas.
Ito ang ihiyag ni Labor Undersecretary Jacinto Paras sa isang live interview sa radio kahapon ng hapon.
Ani Paras, hindi tama na bastusin ang Pangulo ng bansa at tawagin itong ‘sira-ulo’, ‘mamamatay tao’ at ‘kurakot’ ni Trillanes at sulsulan ang mga sundalo na huwag sumunod sa utos ng Pangulo.
Ito’y kaugnay pa rin sa naging pasiya ni Duterte na bawiin ang amnesty ni Trillanes na ipinagkaloob noon ni dating Pangulong Benigno Aquino III kaya’t nabuhay muli ang dati niyang kasong rebelyon noong taong 2003 at 2007 nang pangunahan ang Oakwood Mutiny at Manila Peninsula Siege.
Una nang naghain ng reklamong grave threat o paglabag sa Article 282 ng Revised Penal Code si Paras laban kay Trillanes sa Pasay City Prosecutor’s Office noong nakalipas na Hunyo 6 kaugnay sa pagbabanta umano sa kanyang buhay ng senador sa naganap na Senate hearing ng Oversight Committee on Overseas Foreign Workers na dinaluhan nila noong Mayo 29.
- Latest