Narco cop todas sa drug bust
MANILA, Philippines — Napatay ng mga pulis ang isa nilang kabaro na umano ay sangkot sa illegal drug trade nang manlaban umano ito sa isinagawang drug bust operation kahapon ng umaga sa Barangay Pilaway, Infanta,Quezon.
Kinilala ang napatay na parak na si PO2 Ian Rey Abitona, nasa drug watchlist at residente ng Brgy. Pilaway, Infanta.
Nabatid na si PO2 Abitona ay kabilang sa isinasailalim sa surveillance operation na tinaguriang ninja cop o pulis na sangkot sa illegal drug trade na nagre-recycle ng droga.
Batay sa ulat, bandang alas-7:35 ng umaga nang magkasa ng operasyon ang pinagsanib na elemento ng PNP-CITF, Philippine Drug Enforcement Agency (PDEA) at Provincial Intelligence Branch (PIB) Quezon Provincial Police Office (PPO) laban kay PO2 Abitona.
Habang nagsasagawa ng transaksyon ay nakatunog si PO2 Abitona na mga pulis ang kaniyang ka-transaksyon kaya agad itong bumunot ng baril at pinaputukan ang mga otoridad.
Gumanti ng putok ang mga otoridad at tinamaan at napatay si PO2 Abitona.
Lumalabas sa imbestigasyon na si PO2 Abitona ay isang drug dealer at isang drug protector sa Infanta, Quezon at ginagamit ang isang civilian asset upang makapag-recycle ng illegal na droga.
Si PO2 Abitona ay dating nasibak bilang intelligence and Drug Enforcement Unit (DEU) operatives at kasalukuyang nakatalaga bilang desk officer sa Infanta Police Station.
- Latest
