Sanggol ipina-abort, sinilaban
MANILA, Philippines — Ipinalaglag ng magkasintahan ang nasa sinapupunan ng misis at kanila itong sinilaban sa loob ng sementeryo kamakalawa sa Silang, Cavite.
Ang insidente ay nalaman ng mga otoridad matapos na dinala sa ospital ang babae dahil sa hindi maampat ang pagdurugo ng kaselanan.
Ang ina na patuloy na inoobserbahan sa ospital ay kinilalang si Amanda Oligo, nasa hustong gulang, ng Blk. 17, Lot 9, Brgy. Narra 2, Silang, Cavite. Habang nasa kustodiya ng pulisya ang kinakasama nitong si Ashley Oliveros.
Sa ulat, dakong alas-11:50 ng tanghali nang makatanggap ang pulisya ng tawag mula sa Emilio Aguinaldo Hospital na mayroon umanong pasyenteng ipinasok sa kanila na dinudugo sanhi ng abortion.
Nang imbestigahan ay agad na umamin ang mag-live in na magkatulong nilang isinagawa ang pagpapalaglag sa may mahigit 5 buwang gulang ng sanggol sa sinapupunan ni Oligo sa pamamagitan ng mga gamot at ilang minuto lamang ay dinugo na ito at lumabas ang wala ng buhay na sanggol.
Agad na ibinalot ni Ashley sa kumot ang sanggol at dinala sa Bulihan/Maguyam Cemetery at dito sinunog.
Pinuntahan ng mga pulis ang sementeryo na pinagsunugan at narekober ang sunog na sanggol na dinala sa punerarya para mabigyan ng maayos na libing.
Nakakulong ang lalaking suspek habang kasalukuyan pa ding inoobserbahan ang ina ng sanggol sa ospital.
- Latest
