5 sakay ng tricycle patay sa bangga
MANILA, Philippines — Limang katao na pawang sakay ng tricycle ang nasawi sa magkahiwalay na insidente ng trahedya sa kalsada sa Laguna at Albay.
Sa Lumban, Laguna nasawi ang mga biktimang sina Francisco Lacbay, Glicerio Legazpi at Danny Anonuevo. Habang nilalapatan ng lunas sa pagamutan ang isa pang biktima na nakilala namang si Roberto Pandakila.
Sa ulat, sakay ang mga biktima ng tricycle dakong alas-6:10 ng gabi at binabaybay ang kahabaan ng national highway ng Brgy. Lewin, Lumban patungo sa Kalayaan.
Nag-ovartake umano ang kulay itim na tricycle (DJN-631) na minamaneho ni Lacbay sa kulay dilaw na Mitsubishi Adventure (XBB-310) na minamaneho ni Jesus Nuyda, subalit nasalpok ito ng kasalubong na pampasaherong jeepney (DJB -651) na minamaneho naman ni Joselito Monreal.
Sa lakas nang pagkakabangga ay nagtamo ng matinding sugat ang mga biktima na idineklarang dead-on-arrival sa ospital.
Patay naman ang mag-asawang Rodel at Melina Orayon, residente ng Bulan, Sorsogon nang sumalpok ang kanilang sinasakyang tricycle sa kasalubong na bus sa palikong bahagi ng Maharlika National Highway sa Purok 1, Brgy. Peñafrancia Daraga, Albay noong Linggo ng umaga.
Agad nadakip ang bus driver na si Joey Adra, ng Brgy. San Vicente, Castilla, Sorsogon.
Sa ulat, dakong alas-8:30 ng umaga ay pauwi ang mag-asawa nang mawalan ng kontrol sa palikong bahagi ng highway dahilan para mabanga sila nang kasalubong na Don Don Bus Liner ni Adra.
Sa lakas nang pagkakabangga ay nawasak ang tricycle at tumilapon sa kalsada ang mag-asawa na parehong agad nasawi.
- Latest