13 nene nasagip sa cybersex den
MANILA, Philippines - Nasagip ng mga operatiba ng National Bureau of Investigation-Anti Human Trafficking Division (NBI – AHTRAD) ang 13 batang babae sa sindikato ng sexually-related services sa online sa isinagawang entrapment operation na kung saan ay naaresto ang magkapatid na operator sa Dasmariñas City, Cavite, kamakalawa.
Ang magkapatid na suspek na isinailalim na rin sa inquest proceedings sa Department of Justice (DOJ) sa mga reklamong paglabag sa Republic Act 7619 (Trafficking in Persons Act) at R.A. 10175 (Child Pornography Act) na kinilalang sina Elvie Aringo Y Tijones at Arlene Aringo Y Tijones.
Ang pag-aresto ay batay sa pormal na reklamong idinulog sa NBI-AHTRAD ng U.S. Homeland Security Investigations, Immigration and Customs Enforcement (USHSI-ICE) hinggil sa isang indibidwal sa Dasmarinas, Cavite na nag-aalok sa online ng mga batang babaeng Pinay sa sexually – related shows na ang bayaran ay sa pamamagitan ng money remittance.
Ikinasa ang entrapment kasama ang mga kinatawan ng Department of Social Welfare and Development (DSWD) Region 4-A at koordinasyon sa Philippine National Police at nadakip ang dalawang suspek at naisalba ang 13 nene. Umamin ang lima na sila ay hindi lamang sa online pinagagawa ng kalaswaan, kundi nagbibigay din ng serbisyo sa mga kumukuhang kliyente sa kanila.
- Latest
