2 alalay ng drug pusher, todas
MANILA, Philippines – Napatay ng mga pulis ang dalawang alalay ng target ng kanilang buy-bust operation sa Bacoor City, Cavite kamakalawa ng gabi.
Sa imbestigasyon, alas 9:45 ng gabi nang isagawa ng pulisya ang drug bust sa target na bahay sa Blk. 1, Lot 24, Mustard St., Camella North Springville Brgy. Molino 3, ng nasabing lungsod.
Naaktuhan ng mga pulis na nagpo-pot session ang mga suspek at ilan pang kalalakihan sa bahay ng notorious na drug pusher na si Saturnino Majeco, 55, alyas Bebot.
Ayon kay investigator PO3 Robertson Vallejo, bumunot ng mga baril ang dalawang bodyguard ni Majeco nang mahalatang police asset ang ka-transaksyon nito dahilan para magkabarilan ang mga pulis at mga suspek.
Namatay mula sa tama ng bala sa ulo ang mga suspek na nakilala lamang bilang sina alyas Onyok at alyas Totoy.
Narekober mula sa crime scene ang dalawang kalibre .38 at kalibre .45 na pistol ng mga suspek, tatlong sachet ng hinihinalang shabu na nagkakahalaga ng P15,000 at mga basyo ng bala.
Nahuli naman si Majeco at lima niyang parokyanong karamihan umano’y mga tricycle driver na kinilalang sina Remigio Antillon Jr., 48; Joshua Miguel, 22; Migueito Senadan, 28; Robert Rabang, 32 at Charlie Villegas, 33.
Ilang buwan umanong minamanmanan si Majeco matapos ireklamo ng mga residente nang pagtutulak ng droga sa mga driver. Napag-alaman ding madalas na namamasada ng tricycle ang suspek bilang sideline.
Kinasuhan ang mga naaresto ng paglabag sa Comprehensive Dangerous Drugs Act kahapon.
- Latest
