Pamangkin dinukot ginawang sex slave… rapist na tiyo tiklo sa Facebook

MANILA, Philippines - Hindi sukat akalain ng isang 34-anyos na lalaki na wan­ted sa pagdukot at pang­ha­halay sa 16-anyos na pamangkin na ang paki­ki­pag-eyeball niya sa isang babae na nakilala niya at naging kaibigan sa Facebook dahil sa magandang larawan nito ang magiging daan para siya ay maaresto ng mga pulis sa loob ng SM Manila kamakalawa ng gabi.

Ang suspek ay nakila­lang si Bertrand Esplana, vice-president umano ng isang networking com­pany na ang opisina ay matatagpuan sa City Land, Shaw Boulevard, Pasig City na inaresto sa bisa ng warrant of arrest na inisyu ng Daet Regional Trial Court, Branch 40 hinggil sa reklamong kidnapping and serious illegal detention with rape sa   kanyang pamangkin.

Nag-ugat ang pag-aresto sa suspek nang mag­padala ng e-mail kay Manila Mayor Alfredo Lim ang isang Mark Gher­son Galarion, nobyo ng biktima at humingi ng tu­long para madakip ang suspek.

Agad na inatasan ni Manila Mayor Alfredo Lim ang Mayor’s Com­plaint and Action Team (MCAT) na makipag-ugnayan kay Galarion para planuhin ang entrap­ment.

Ayon sa nobyo ng bik­tima na naisipan niya na gumawa ng bagong Facebook account at ipinalabas niya na babae siya at nag-post ng magaganda at naka­kabighaning larawan at nakipagkaibigan sa sus­pek sa pamamagitan ng chat.

Sa pag-aakala ng sus­pek na maybago si­yang bibiktimahin ay naki­pag­kasundo itong makipag-eye ball sa Robinsons Gal­leria na sa huli ay pinilit ni Galarion sa SM-Manila na lang magkita at pumayag ang suspek na kung saan ay doon na siya naaresto ng mga tauhan ng MCAT dakong alas-6:50 ng gabi sa SM Manila, tapat ng National Bookstore.

Ang biktima ay dinu­kot, ikinulong at iginahasa ng apat na beses ng suspek sa loob ng 5 buwan noong nakalipas na taon sa Daet, Camarines Sur.

Kahit todo-tanggi ang suspek ay mariing iginigiit ng ama ng biktima (kapatid ng suspek) na ito ang du­mukot at gumahasa sa kaniyang anak, bukod pa dito ay ginahasa din nito ang kanyang hipag sa Ba­guio City at anak ng hipag  na 12-anyos lamang  na natakot magsampa ng reklamo dahil sa pana­nakot nito.

Nakatakdang i-turn-over ang suspek sa Daet, lalawigan ng Bicol para sa paglilitis.