Yulo brothers handa na sa Worlds

MANILA, Philippines — Handa na ang Yulo brothers na sina Carlos Edriel Yulo at Karl Eldrew na magpasiklab sa FIG Artistic Gymnastics World Championships na gaganapin sa Rotterdam, Netherlands sa Oktubre 18 hanggang 25.

Nasa Antwerp, Bel­gium na ang Yulo brothers upang doon ipagpatuloy ang paghahanda para sa World Championships.

Galing ang Yulo bro­thers sa matagumpay na kampanya sa 2026 Asian Games sa Nagoya, Japan kung saan nakasungkit si Caloy ng dalawang ginto sa men’s floor exercise at men’s vault.

Nakapagbulsa naman si Eldrew ng tanso sa men’s horizontal bar.

“We had a competition in the Asian Games, so that one also is part of my prepa­ration to go to the World Championships, so now we’re almost complete in our training camps, and we’re ready to go to the World Championships,” ani Caloy.

Sasabak si Caloy sa anim na apparatus events — ang floor exercise, vault, pommel horse, still rings, parallel bars at horizontal bar.

“I’m going to do six apparatuses, and hopefully we get to the finals,” ani Caloy.

Makakasama ng Yulo brothers sina Haylee Garcia at Juancho Besana.

Sumalang din sina Garcia at Besana sa Asian Games.

Nagtapos si Besana sa ikalimang puwesto sa men’s vault final.

Malalim na rin ang karanasan ni Besana na gold medalist sa vault noong 2023 Southeast Asian Games sa Cambodia habang nakatanso ito sa parehong event noong 2021 Vietnam Games.