Jerusalem ready sa rematch

MANILA, Philippines — Pagbibigyan ni WBC mini-flyweight champion Melvin Jerusalem kung hihiling ng rematch ang kampo ni Japanese fighter Yudai Shigeoka.

Ito ang inihayag ni Sanman Promotions CEO JC Manangquil kung saan nilinaw nito na walang rematch clause sa kontrata nina Jerusalem at Shigeoka.

Ngunit maaaring humiling ang grupo ng Japanese fighter kung nanaisin nito.

“May option yung promoter ng dating champion if they want a rematch,” ani Manangquil.

Nais rin ni Manangquil na ganapin sa Pilipinas ang susunod na laban ni Jerusalem.

“A plan is we can do a title fight here, but if we can have a shot at a unification, another option din yun. The bigger fights, the better for Melvin yun,” ani Manangquil.

Sariwa pa si Jerusalem sa matamis na split decision win laban kay Shigeoka noong Linggo sa labang ginanap sa International Conference Hall sa Nagoya, Japan.

Kung si Jerusalem ang tatanungin, mas gugustuhin nito ang unification fight.

Target ni Jerusalem na makuha ang apat na world title belts sa kanyang dibisyon.

“Kung bibigyan ako ng chance, gusto ko makakuha pa ng maraming belts, unification talaga. Kasi pangarap ng mga boxer talaga na makuha yung four major belts,” ani Jerusalem.

Sa kasalukuyan, hawak ni Knockout Freshmart ng Thailand ang WBA belt habang si Ginjero Shigeoka na kapatid ni Yudai naman ang nagmamay-ari ng IBF title.

Nasa kamay naman ni Puerto Rican Oscar Collazo ang WBO belt.