Heat pinalamig ng Warriors
MIAMI — Nagbalik si Klay Thompson sa starting lineup at kumamada ng 28 points habang may 18 markers si Jonathan Kuminga sa 113-92 panalo ng Golden State Warriors sa Heat.
Nag-ambag sina Stephen Curry at Andrew Wiggins ng tig-17 points para sa Golden State (37-34) na naiwanan sa halftime, 53-55, bago nagtayo ng 22-point lead sa fourth period.
Umiskor si Bam Adebayo ng 24 points sa panig ng Miami (39-33) na naglaro na wala sina leading scorer Jimmy Butler (illness), Tyler Herro (foot), Kevin Love (heel) at Duncan Robinson (back).
Tumipa sina Haywood Highsmith at Terry Rozier ng tig-15 points para sa Heat na nakalapit sa 81-87 sa pagsisimula ng fourth quarter kasunod ang 26-11 atake ng Warriors para kunin ang panalo.
Sa Milwaukee, ipinoste ni Austin Reaves ang kanyang ikalawang career triple-double sa tinapos na 29 points, 14 rebounds at 10 assists sa 128-124 paglusot ng Los Angeles Lakers (40-32) sa Bucks (46-26).
Humakot si Anthony Davis ng 34 points at 23 rebounds para sa Los Angeles habang hindi naglaro si LeBron James (left ankle sprain).
Kumolekta si Giannis Antetokounmpo ng 29 points, season-high 21 rebounds at 11 assists para sa kanyang pang-siyam na triple-double sa season sa panig ng Milwaukee.
Nagdagdag si Damian Lillard ng 27 markers kasunod ang 21 points ni Malik Beasley.
Sa Sacramento, hinugot ni Luka Doncic ang 26 sa kanyang 28 points sa first half para igiya ang Dallas Mavericks (43-29) sa 132-96 pagdaig sa Kings (42-30).
Sa New Orleans, bumanat si Jalen Williams ng 26 points para tulungan ang Oklahoma City Thunder (50-21) sa 119-112 pagpulutan sa Pelicans (44-28).
- Latest
