Cone tiwala sa kakayahan ni Kai

MANILA, Philippines — Hindi maitago ni Gilas Pilipinas head coach Tim Cone ang paghanga nito kay Kai Sotto na malaki ang posibilidad na makapaglaro sa NBA.

Mismong si Cone na ang nakasaksi sa malaking pagbabago sa paglalaro ni Sotto habang naghahanda ang Gilas Pilipinas para sa FIBA Asia Cup 2025 Qualifiers.

Kumana ang 7-foot-3 Pinoy cager ng averages na 15.5 at 14.0 rebounds sa dalawang laro ng Gilas Pilipinas kontra sa Hong Kong at Chinese-Taipei.

“He is going to absolutely dominate Asia. I’ve always felt that,” ani Cone.

Ramdam ang presensiya ni Sotto partikular na sa laban ng Gilas Pilipinas kontra sa Chinese-Taipei.

Umiskor ito ng tatlong blocks habang nagbigay din ito ng solidong depensa para mahirapang makapuntos ang Chinese-Taipei.

Nakikita ni Cone na malaki ang tsansa ni Sotto na mas lalo pang tumaas ang laro na maaaring maihalintulad sa mga European players.

“If you get him into the right spots, he can absolutely dominate Asia. For him, the next spot is to get up to the European level and the NBA level and we are hoping that we can help him get into that level,” ani Cone.

Hindi naman na bago si Cone sa mga world-class players dahil naging bahagi na ito ng Miami Heat coaching staff sa NBA Summer League.

Inaasahang babalik na agad si Sotto sa Japan para makasama ang Yokohama B-Corsairs sa Japan B.League.