Al Riyadi sinilat ang Strong Group
MANILA, Philippines — Bigo ang Strong Group na masikwat ang korona matapos isuko ang 74-77 desisyon sa defending champion Al Riyadi sa finals ng 33rd Dubai International Basketball Championship kahapon sa Dubai, UAE.
Pinakawalan ni Ismail Abdelmoneim ang buzzer-beating triple upang tuluyang tuldukan ang paghahabol ng Strong Group.
Nakakuha ng pagkakataon ang 6-foot-9 Lebanese-Egyptian mula sa assist ni Lebanese national star Wael Arakji.
Ito ang ikalawang sunod na kampeonato ng Al Riyadi sa naturang torneo.
Ang Al Riyadi rin ang tumalo sa Strong Group sa quarterfinals noong nakaraang taon.
Tinapos ng Strong Group ang torneo sa 7-1.
Hindi naman basta-basta sumuko ang Strong Group.
Nakabangon ito sa 19 puntos sa ikatlong kanto nang maglatag ang Strong Group ng 29-6 bomba para makuha ang 65-61 bentahe.
Nanguna sa naturang ratsada ng Strong Group sina Andre Roberson, McKenzie Moore, Jordan Heading at dating NBA star Dwight Howard.
Tumabla ang iskor sa 74-74 mula sa tres ni Heading sa huling segundo ng laro.
Subalit isinalpak ni Abdelmoneim ang game-winning triple para makuha ng Lebanese team ang panalo.
Nanguna para sa Strong Group si Roberson nang magtala ito ng 27 points.
- Latest