MANILA, Philippines — Bagama’t bigong magkampeon sa Season 86 ay kuntento si University of the Philippines standout CJ Cansino sa kanyang naging collagiate career.
Lilisanin ni Cansino ang UAAP na may isang korona at runner-up sa kanyang pangalan.
Bahagi si Cansino ng University of the Philippines na nagkampeon sa Season 84, habang nagtapos lamang ang Fighting Maroons bilang runner-up sa Season 86.
Lumasap ang UP ng 69-73 kabiguan sa Game Three ng best-of-three championship series laban sa De La Salle University noong Miyerkules.
“You guys saw the game earlier, we gave our best but we fell short, that’s life, it’s not for us,” wika ni Cansino.
Ngunit mas nais ni Cansino an maalala na naging parte ito ng Fighting Maroons na naghari noong Season 84 kung saan tinuldukan ng kanilang tropa ang mahigit na tatlong dekadang pagkauhaw ng UP sa titulo.
Bago pumasok sa UP ay naglaro muna si Cansino ng dalawang seasons sa University of Santo Tomas.
Nagpasya itong lumipat sa UP matapos ang kontrobersiyal na Sorsogon bubble sa kasagsagan ng pandemya.
Kaya naman malaki ang pasasalamat nito sa UP community sa mainit na pagtanggap sa kaniya.
“First of all, me and Malick (Diouf) are thankful for the UP community’s unwavering support. They love like no other would, win or lose, they support you. So, we’re thankful for our career in UP,” ani Cansino.