Rain or Shine ipipinta ang ika-2 sunod na panalo

MANILA, Philippines — Matapos makalasap ng unang panalo, hindi na magpapaawat ang Rain or Shine kontra sa NLEX, habang tangka ng San Mi­guel at NorthPort na ma­palawig ang winning streak sa 2023 PBA Commissioner’s Cup sa Philsports Arena sa Pasig City.

Magpapambuno ang Elasto Painters (1-5) at Road Warriors (2-4) ngayong alas-4 ng hapon ba­go ang banggaan ng Beermen (3-1) at Batang Pier (4-2) sa alas-8 ng ga­bi.

Kagagaling ng Rain or Shine sa unang panalo kontra sa Blackwater, 115-110, tampok ang ba­gong import na si Demetrius Treadwell matapos ang limang sunod na kabiguan upang manati­ling buhay sa kontensyon.

Sasakay ang mga ba­taan ni coach Yeng Guiao sa momentum ng tagumpay na iyon sa tulong nina Rey Nambatac, Santi Santillan, Andrei Caracut, Gabe Norwood, James Yap at rookie Adrian Nocum.

Kahit may bago ding import na si Stokley Chaffee ay sad­sad sa dalawang sunod na ka­biguan ang Road Warriors, pinakabago ang di­kit na 94-97 pagyukod sa Meralco.

Nakasakay naman sa tatlong sunod na panalo ang SMB kahit wala si seven-time MVP June Mar Fajardo (hand injury).