Top players sina Belen, Canino

MANILA, Philippines — Dahil sa kanilang husay, igagawad kina Angel Canino ng De La Salle University at Bella Belen ng National University ang Collegiate Volleyball Player of the Year award.

Tunay na maningning ang ratsada nina Canino at Belen na tinulungan ang kanilang tropa na masungkit ang kampeonato sa UAAP women’s volleyball tournament.

Si Canino ang nanguna sa ratsada ng Lady Spikers para masikwat ang kam­peonato sa UAAP Season 85 kamakailan.

Itinanghal ang 5-foot-11 outside spiker na si Canino bilang Rookie-MVP kasama pa ang Best Outside Hitter award.

Sa kabilang banda, si Belen ang humatak sa Lady Bulldogs nang walisin nito ang lahat ng kanilang asignatura para masungkit ang korona sa UAAP Season 84.

Pinangalanan din si Belen bilang Rookie-MVP at Best Outside Hitter sa naturang season.

Maliban kina Canino at Belen, gagawaran din ng Collegiate Volleyball Player of the Year awards sina NCAA players Mycah Go at Gayle Pascual na parehong miyembro ng College of St. Benilde.

Si Go ang tumulong sa Lady Blazers para masweep at makuha ang korona ng NCAA Season 97 noong 2022.

Napasakamay ni Go ang MVP award sa natu­rang edisyon.

Hindi rin nagpahuli si Pascual na bumandera sa ratsada ng Lady Bla­zers para masiguro ang kampeonato sa NCAA Season 98.

Pinangalanang Best Opposite Spiker si Pascual sa naturang season.