Trollano nagpasabog ng 44 pts sa panalo ng NLEX

MANILA, Philippines — Nagpaputok si Don Trollano ng career-high na 44 points tampok ang siyam na three-point shots para banderahan ang NLEX sa 142-125 paggiba sa Terrafirma sa 2023 PBA Go­vernors’ Cup kahapon sa Smart Araneta Coliseum.

Ang ikalawang sunod na panalo ng Road Warriors ang nagtaas sa kanilang record sa 7-3 papalapit sa isa sa apat na ‘twice-to-beat’ incentive sa quarterfinals.

“Siguro kailangan talaga naming manalo eh,” wika ni Trollano. “Crucial iyong game na ito, for us trying to get to the top four para sa twice-to-beat.”

Nagdagdag si import Wayne Selden Jr. ng 38 markers kasama ang anim na triples habang may 19 at 15 points sina Brandon Ganuelas-Rosser at Kevin Alas, ayon sa pagkakasunod.

Ito ang pang-limang dikit na kamalasan ng Dyip, nakahugot kay Juami Tiongson ng 38 points kasama ang anim na tres, na naghulog sa kanila sa 2-7.

Matapos ang jumper ni Aldrech Ramos na nagdikit sa Terrafirma sa 42-44 sa 6:23 minuto ng second period ay nagpakawala ang NLEX ng isang 22-7 atake para ilista ang 66-49 abante sa halftime.

Isinara ng NLEX ang third period sa 110-87 bago tuluyang ibaon ang Terrafirma sa 131-105 sa huling 4:39 minuto mula sa pang siyam na triple ni Trollano.