‘Di pa panahon ni Sotto
Posibleng lumaro sa Gilas Pilipinas
MANILA, Philippines — Bigong makamit ni Filipino sensation Kai Sotto sa ngayon ang mithiing maging kauna-unahang homegrown player sa big stage matapos maging undrafted sa 2022 NBA Rookie Draft kahapon sa Brooklyn, New York.
Hindi napili si Sotto sa two-round proceedings tampok ang 58 draftees mula sa lagpas 100 aplikante sa pangunguna ni No. 1 overall pick Paolo Banchero ng Duke na napunta sa Orlando Magic.
Second overall pick si Chet Holmgren ng OKC Thunder habang kinumpleto nina Jabari Smith (Houston), Keegan Murray (Sacramento) at Jaden Ivey (Detroit) ang top 5 picks.
Nasa top 10 din sina Benedict Mathurin (Indiana), Shaedon Sharpe (Portland), Dyson Daniels (New Orleans), Jeremy Sochan (Sacramento) at Johnny Davis (Washington).
Bitbit ni 7-foot-3 Sotto ang pag-asa ng buong Pilipinas sa NBA draft para sana maging kauna-unahang full-blooded Pinoy na makapasok sa NBA bago lumiko ang tadhana matapos ang dalawang rounds.
Ito ay sa kabila ng magiting na performance ni Sotto sa NBA Draft workouts para sa Orlando Magic, New York Knicks, Atlanta Hawks, Cleveland Cavaliers, Chicago Bulls, Sacramento Kings at Indiana Pacers.
Sa kabila nito, hindi nawawalan ng pag-asa si Sotto na makakapasok pa rin sa NBA lalo at maituturing na siyang free agent na puwedeng mapapirma ng kahit anong NBA team.
“The dream is always the NBA so I have to do whatever it takes to get better, get stronger and to improve,” sabi ng 20-anyos na si Sotto.
Wala pang desisyon si Sotto para sa kanyang susunod na hakbang pero posibleng maglaro siya sa Gilas Pilipinas para sa mga nakalinyang torneo sa susunod na buwan sa third window ng 2023 FIBA World Cup Asian Qualifiers at 2022 FIBA Asia Cup.
Nakasalang din kay Sotto ang NBA Summer League sa susunod na linggo.
- Latest
